Forza, brasa e baloncesto: A Parrillada O Establo convértese no noso novo Socio Local!

 

Para competir ao máximo nivel na 2ª División Autonómica fai falta moita enerxía, e que mellor combustible que o dun bo asado! Temos o enorme pracer de anunciar que a Parrillada O Establo se incorpora á nosa rede de patrocinadores para esta ilusionante tempada 2026/2027.

O coñecido restaurante de Lamas de Laraño, famoso pola súa espectacular grella e o seu inconfundible "latexar arxentino", decidiu apostar polo noso club e acompañarnos neste salto de categoría. Unha alianza que nos enche de orgullo e que demostra o vital que é o respaldo do comercio da nosa contorna para que o deporte en Ames poida seguir medrando.

A partir de agora, a imaxe de O Establo estará moi presente en cada partido que xoguemos na casa. O seu flamante Golf Banner xa está instalado a pé de pista no Pavillón do Milladoiro, e os nosos xogadores non dubidaron en estrealo posando xunto a el ao final do adestramento. Unha lona publicitaria que sen dúbida chamará a atención na nosa bancada e que, seguramente, lle fará a boca auga a máis dun!

Dende a directiva do Club Baloncesto Ames, queremos transmitirlle todo o noso agradecemento a Mercedes, a Carlos e a todo o persoal de O Establo por confiar no noso proxecto deportivo. Con apoios coma o voso, a nosa fame de vitorias é aínda maior.

Grazas por sumarvos ao noso equipo!

A Clínica de Fisioterapia Laura Míguez únese á familia do CB Ames como Socia Local!

 

A maquinaria do Club Baloncesto Ames non para! O ascenso á 2ª División Autonómica esixe o mellor de nós tanto dentro como fóra da pista, e por iso seguimos traballando duro para construír un proxecto sólido da man do tecido empresarial do noso concello.

Hoxe estamos de celebración porque onte mesmo, mércores, materializouse oficialmente o acordo de patrocinio coa Clínica de Fisioterapia Laura Míguez, que se converte nunha peza clave do noso equipo en calidade de Socia Local para a tempada 2026/2027.

Tras a rúbrica do contrato por parte da nosa directiva e de Laura Míguez, a clínica pasará a ter unha presenza destacada nos nosos partidos como locais. De feito, o seu novo Golf Banner xa locía onte espectacular a pé de pista no noso pavillón do Milladoiro, onde o primeiro equipo posou ao completo xunto ao novo soporte publicitario.

Dende o club queremos darlle as grazas a todo o equipo de Fisioterapia Laura Míguez (situados na Rúa das Palmeiras 31, Baixo, no Milladoiro) pola súa aposta valente polo noso deporte e pola saúde. É todo un orgullo levar o voso nome con nós.

Benvidos á familia do CB Ames!

O soño comeza en Vigo

Rematou a espera. O traballo dos despachos, os adestramentos físicos e os partidos de preparación deixan paso ao que de verdade importa: o balón bota de novo. Este domingo 11 de outubro arranca unha temporada histórica para o Club Baloncesto Ames co noso ansiado debut na 2ª División Autonómica.

O primeiro desafío desta fase regular, onde estamos encadrados no esixente Grupo Sur xunto a equipos do nivel do Porriño Baloncesto Base, Asociación Baloncesto Xinzo ou Seis do Nadal, levaranos ata Vigo. Medirémonos ao Rías Baixas Sel no pavillón do Berbés, nun encontro que comezará ás 12:00 horas. Será a primeira proba de lume (de catorce xornadas nesta primeira fase) para un grupo que mantén a base do éxito, pero que chega con enerxías renovadas.

Precisamente, a gran nova desta pretempada é a incorporación de Pablo e Juanjo. Dous rapaces que veñen inxectar xuventude, potencia física e ambición á nosa estrutura, sumando forzas para afrontar o salto de categoría con todas as garantías.

Afrontamos este curso cun obxectivo claro: pelexar por cousas grandes e ilusionar á nosa afección. Iso si, o noso ADN non cambia. Sabemos que calquera éxito que poidamos conseguir pasará única e exclusivamente pola humildade, a paixón en cada cuarto e o traballo incansable de luns a venres. Soñar é gratis, pero as vitorias gáñanse suando a camiseta.

E para demostrar que o bo ambiente segue intacto, o equipo quixo dar o pistoletazo de saída a esta campaña do mesmo xeito que despedimos a anterior: ao redor dunha boa mesa. A pasada fin de semana gozamos dunha cea espectacular na Parrillada O Establo —unha contorna inigualable, cuns pratos de primeira e cun trato espectacular por parte do seu persoal— onde por fin recibimos o trofeo e as medallas de subcampións galegos do ano pasado. O peche perfecto a un ano inesquecible e o mellor impulso para o que está por vir.

Parrillada O Establo: ESPECTACULAR!

A Xunta Directiva posando orgullosa co trofeo de subcampións galegos

A todos os que sempre estades aí, aos nosos novos socios e patrocinadores que fan isto posible, e ás familias que enchedes de cor a bancada: preparádevos. A viaxe comeza xa e ímosvos necesitar en cada partido.

Vémonos o domingo en Vigo. Ímos con todo!